८ श्रावण २०८१, मंगलबार | Wed Jul 24 2024

धुलिखेल सडक विस्तार घरटहरा हटाउन सुरु




काठमाण्डौ माघ २३, ( अरनिको राजमार्गअन्तर्गत भक्तपुरको सूर्यविनायकदेखि साँगा हुँदै धुलिखेलसम्मको ६ लेन सडक विस्तार थालिएको छ । सडक किनार र विस्तार गर्नुपर्ने ठाउँमा निर्माण भएका घरटहरा पनि भत्काउन थालिएको छ ।

अरनिको राजमार्ग विस्तारमा मापदण्ड विपरीत र सडक मापदण्ड मिचेर सूर्यविनायक नगर क्षेत्रभित्र निर्माण भएका घरटहरालगायत भौतिक संरचना प्रहरी र सूर्यविनायक नगर प्रहरीको सुरक्षामा डोजर लगाएर भत्काउन शुरु गरिएको सूर्यविनायक नगरपालिकाका प्रवक्ता रवीन्द्र सापकोटाले बताउनुभयो ।

सूर्यविनायक–धुलिखेल सडक विस्तार आयोजनाले जगातीदेखि साँगासम्म र साँगाबाट धुलिखेलसम्म दुई चरणमा एकैसाथ सडक विस्तार गरिरहेको छ । कार्य क्षेत्रमा खटिएका आयोजनाका इञ्जिनियर विवेक पाण्डेले सडकको केन्द्रबाट ७५ फिटको क्षेत्राधिकारभित्र रहेका अस्थायी संरचना भत्काउन शुरु गरिएको बताउनुभयो ।

सडक मापदण्डभित्र रहेका संरचना नभत्काइँदा सडक विस्तारमा अवरोध भएपछि भक्तपुरका प्रमुख जिल्ला अधिकारी रोशनीकुमारी श्रेष्ठको नेतृत्वमा आयोजना प्रमुख, सूर्यविनायक नगरपालिकालगायत सरोकारवाला निकायबीच भएको छलफलपछि त्यस्ता संरचना हटाएर सडक विस्तारमा सहजीकरण गर्न नगरबासीलाई पत्राचार गरिएको थियो ।

प्रकाशित मिति : २३ माघ २०८०, मंगलबार  ८ : ४५ बजे